1Th 5 | KYG | STEP | Konagatimogitapae, huta, hainu afina'mo afole aisifi hainu afina'mo eminesifi huta ani kavafe'mo avo'mo kaesuna gemo alagi ohane'niye. Lapakaemo ago afi'naya'mofe'mae.

1 Thessalonians 5

Ala kava ne'mo eminesiya'ae'mo alo huta maigetao, huno hu'niya gemae

1 Konagatimogitapae, huta, hainu afina'mo afole aisifi hainu afina'mo eminesifi huta ani kavafe'mo avo'mo kaesuna gemo alagi ohane'niye. Lapakaemo ago afi'naya'mofe'mae. 2 Ago afi'nayana kava no'yagaiya hani'ilagamo kumaya vaya'mo ne'aya kava huno Ala kava ne'mo afina'amo afole aigiye. 3 Vaya'mogi, alagepa huta ne'maunanageta ani kavake'mo huta maigune, hu'a nehisageno'ae'mo malage huno hosu kava'mo apakaetegamo afole aiteno alino hano huno apategaiye. A'nemogimo mafa'nemo ali'a apategefe nehaya afina'mo fiku mai'nageno'ae'mo apakafu nekiya kava'mo malage huno afole aisige'apae'mo ae'a kasalo opaegae. 4 Konagatimogitapae, huta, ae'a kasalo opaegaya'monanafa kumaya vaya'mo ne'age'apae'mo hapau ne'aiya kava hutapa lapakaemo hanipi'mo no'maiya'mofe'mo ani afina'mo lapakaetegamo afole aisigetapae'mo lapau o'aigae. 5 Lagaemo hanipi'mo o'maige hani'ilagamo umenitata nehaya vayakana huta o'maige huta mai'none. Muki'amogitapamo ha le yategamo mai'netapa felugamo umenitata nehaya vayakana hutapa mai'nae. 6 Mai'nona'mofe'mo mago vaya'mo apau kale'a ne'maiya kava huta lagaemo lau kaleta o'maita laipa lagesale'mo yagaita lateteta maigetao. 7 Apakaemo hani'ilagamo apau kalege hani'ilagamo ani'mo nete'a negi malege hu'a ne'maiya'monanafa 8 lagaemo feluga umenitata nehaya vayakana huta laipa lagesale'mo yagaita lategetao. Ati vaya'mogimo kame vaya'apimogimo ohapaesayafe'mo lokiya aeni siotimo ali'a ne'vaiya kava huta lagesa afita fatago nehuta lahau layamopafi'mo lahaino. Ati vaya'mogi lokiya aeni kakolitamo ali'a ne'malaya kava huta Goti'a lagufamo alino katino latesiyafe'mo agava mai'neta lavayagunagu huta maigetao. 9 Goti'a aipamo leno lateteno kayo'mo lamisiyafe'mo lekana paino olate'nifa Ala kava netimo Yesu Kalaisiteti'mo laha maesiyafe'mo lekana paino late'niye. 10 Falitesunageno eminesifi afa'a mai'nisunageno eminesifigeta agae'e'mo magokepi lokaeta maisunafe'mo falino late'niye. 11 Hu'niya'mofe'mo lapakaemo nehaya agufa kava'mo hutapa konagatapimogimo mago'e hutapa hapa maetapa apaipamo alita lokiya vaitapa ne'apatetapa alita falu fala hutapa apateyo.

Ge atupa gemae

12 Konagatimogitapae, huta, lapao ke honanagi lapakae folagapi'mo ali'ya alige yagai'a lapatege ali'a api ai'a lapatege hu'a ne'maiya vaya'aife'mo, lagae kava vayatimo mai'nae, hutapa apakaefe'mo alagepa hutapa lapakesamo afiyo. 13 Goti ali'ya ne'aliya'mofe'mo alagepa vaya'mo mai'nae, hutapa apakaefe'mo lapau lapayamopafi'mo lapaino. Magoke lapaipa lapakesamo alitetapa magokepi lokaetapa maiyo. 14 Konagatimogitapae, huta, lapao ke honanagi alaga nehapaege'a afa'a ne'maiya vaya'aife'mo, ehetapiye, alaga olapaeno, hutapa hapa paiyo. Koli nehaya vaya'ai apaipamo alita lokiya vaitapa apateyo. Lokiya no'vaiya vaya'aina hapa maeyo. Muki vaya'aitegamo vase vase hutapa falu fala kava'mo hiyo. 15 Vaya'mogi hosu kava'mo anona'apilefe'mo ae'a atagaina hu'a osisayafe'mo alagepa huta yagaitapa apateyo. Lapakaemo muki afina'mo konagatapimogitega'e muki vaya'aitega'e'mo lapayamukiki hutapa alagepa kava'mo hiyo. 16 Muki afina'mo lapamogaga aiyo. 17 Muki afina'mo o'ataletapa nunumu'mo hiyo. 18 Muki agufa agafa kavatefe'mo Gotifeke'mo hao ke heyo. Kalaisi Yesupi'mo mai'netapae'mo ani kava'mo hisayafe'mo Goti'a hau'niye. 19 Goti Auneme'amo'mo ata legekana huno ali'ya'mo ne'aliyanagi aetapa yu oseyo. 20 Ani kavatefe'mo vaya'mogimo Goti Auneme'aleti'mo lapa nepaiya gee'mo ina agufa gemo nehae, hutapa osiyo. 21 Osutapa muki kava'e ge'e'mo alita fako hutapa atege afige nehutapa alagepa kava'e alagepa ge'e'mo atafauta alita lapaipafi'mo maleyo. 22 Muki agufa agafa hosu kava'amo maita halove hutapa ateyo.

23 Goti'a agae'e'mo magokepi alino lokaeno lateteno laipamo alino falu huno nelateya vekamo'a alino alagepa huno lapate'niyanagi alagi lapaoteke'mo maiyo. Agaemo muki lapaunelapametenagi lapaipa lapakesalenagi lapakufalenagi huno yagaino lapate'nisigeno Ala kava netimo Yesu Kalaisi'a eminesiya afina'mo mago hosu kavatapimo ohane'nisigeno vai'mo olapamino. 24 Lapakaefe'mo keya aeno ge hu'niya vekamo'a agai'a avayafati'mo hu'niya ge'amo akame nehiya'mofe'mo ani kava'mo afa'a hugiye. 25 Konagatimogitapae, huta, nunumu'mo hutapa lateyo. 26 Muki konagatapimogimo alita falu fala hutapa ne'apatetapae'mo lapaote lapaipamo kali'netapa hapaetapa neyo. 27 Nagaemo Ala kava ne'mo himamu'aleti'mo hu'nae'mo, mani avo'mo alita lekana paige'apao muki apaote konagatimogi afiyo. 28 Ala kava netimo Yesu Kalaisi'a fiku lapa maeno lapaminagetapa maiyo. He, lama gemo.